Trump në Tiranë? Kur dhe pse?
Ngarrendja e Ramës drejt 2027-ës pa ardhur akoma 2026-ta
Presidenti amerikan në pritje, Donald Trump, sipas kryeministrit Rama, do jetë në kryeqytetin shqiptar në 2027-ën.
Ishte vetë Rama që e kumtoi këtë lajm, që sipas tij, mishëron nivelin ku po ngjitet Shqipëria si actor në arenën ndërkombëtare. Po pse do vijë në Trump në Tiranë? Jo si një vizitë klasike e tij në një vend, por në kuadër të një samiti të NATO-s, siç u shpjegua nga Rama.
“Akoma më e pamendueshme deri disa vite më parë ishte mikpritja në Tiranë e Samitit të NATO-s në vitin 2027, gjë për të cilën ne kemi filluar punën së bashku me NATO-n. Një mision inspektimi i kushteve të infrastrukturës dhe logjistikës ka ardhur në Tiranë dhe ka bërë vlerësime që do të ishin të pamundura në Tiranë para se qeveria në aleancë me Bashkinë e Tiranës të ndërtonte çfarëdo ka ndërtuar në këtë dekadë. Ardhja e Presidentit të SHBA-ve dhe të gjithë udhëheqësve të NATO-s është njëkohësisht një mesazh i qartë për të gjithë lidhur me Shqipërinë dhe lidhur me pozicionin tonë të ri politik në arenën ndërkombëtare. Ne jemi një vend i vogël. Kemi një peshë modeste, por sot trajtohemi si të barabartë dhe me një respekt që asnjëherë nuk e kemi pasur në historinë tonë”, tha Rama.
Gjithsesi, është herët të flitet për 2027-ën kur para është 2026-ta, e cila nuk dihet se ç’sjell deri në ardhjen e mundshme të Trumpit në Tiranë. /tesheshi.com/
