Një shqiptar gjakprishur, ministër në qeverinë e re serbe

Një shqiptar gjakprishur me mbiemrin Berisha është përzgjedhur për të qenë ministër në një qeveri të re në Serbi.

Ai është Demo Berisha, i cili pritet të mbajë postin e ministrit për të drejtat e njeriut, minoritetet dhe për dialogun social. Demo Berisha në të kaluarën ka mohuar ekzistencën e shtetit të Kosovës, madje, sipas raportimeve të mediave, ka kërkuar që pushtuesi serb të kthehet në Kosovë. Ai thotë se ka lindur në Pejë dhe se tani jeton në Vojvodinë, megjithatë i referohet Serbisë si atdheu i tij, raporton A2 CNN.

Për vite me radhë, ai e ka quajtur Kosovën si “Kosova dhe Metohija” dhe pretendon se nuk është shqiptari i vetëm në Serbi që mendon kështu. Për këtë arsye, thotë se ka krijuar në 2014-ën, organizatën joqeveritare në Serbi me emërtimin “Amëza e shqiptarëve në Serbi”.

Demo Berisha ka publikuar dhe një revistë ku një prej ballinave ia ka kushtuar 100-vjetorit të kalimit të ushtrisë serbe përgjatë Shqipërisë. Ai madje dhe i ka thurur lavde Esat Pashë Toptanit për përkrahjen që u ka bërë serbëve. Kjo duket se është edhe lidhja e tij në ideologji me Aleksandër Vulin, i cili në Francë bëri homazhe te varri i Esat Pashë Toptanit duke e quajtur një “hero të Serbisë”.

Reagimi

Ndaj këtij zhvillimi ka reaguar ashpër deputeti i njohur shqiptar në Kuvendin e Serbisë, Shaip Kamberi. Kjo sipas tij është një goditje e rëndë për çdo shqiptar që ka vuajtur, rezistuar dhe sakrifikuar për të drejtat e veta në Serbi.

“Ky emërim është jo vetëm politikisht i papranueshëm, por edhe moralisht i turpshëm. Sepse Demo Berisha nuk është një përfaqësues i të drejtave të njeriut, por një simbol i mohimit të identitetit kombëtar dhe politik të shqiptarëve të Kosovës dhe të Luginës së Preshevës.

Siç dëshmojnë pamjet, deklaratat dhe intervistat publike, Demo Berisha është një ish-oficer i ushtrisë serbe, pjesë e strukturave që kanë qenë të përfshira në krime të luftës në Kosovë.

Edhe pse thotë se është nga Peja, ai publikisht deklaron se atdheu i tij është Serbia, se Kosova është ‘Kosova e Metohisë’ dhe mohon ekzistencën e Republikës së Kosovës. Jo vetëm kaq – ai është themelues i një organizate me emër serb, ‘Matica Albanaca Srbije’, ku mbrohet trashëgimia e bashkëpunëtorëve të Serbisë në periudhat më të errëta të historisë sonë, madje edhe Esat Pashë Toptani, i njohur për tradhti ndaj kombit shqiptar.

Demo Berisha vetem mund te jete Faik Jashari 2.0, i cili ishte pjesëmarrës në delegacionin e Serbisë në Rambuje. Faik Jashari, edhe pse kishte zgjedhur të mbetet pjesë e institucioneve të Serbisë para vitit 1999, pas luftës u detyrua të largohej nga Kosova dhe për 20 vjet nuk është kthyer më.

Ai është simbol i një të kaluare që ka përfunduar. Ai mbetet jashtë institucioneve, jashtë Kosovës, si një figurë e harresës dhe disfatës, figure kuislinge.

Ndërsa Demo Berisha, i cili ndan të njëjtën ideologji me Jasharin – që Kosova është Serbi dhe shqiptarët duhet të nënshtrohen nën këtë realitet – po promovon këtë frymë si ‘shqiptari model’ për Serbinë.

Ai shfaqet në intervista duke mohuar NATO-n, duke përkrahur narrativën serbe për luftën dhe duke u paraqitur si përfaqësues i shqiptarëve në Serbi. Ai është përdorur dhe po përdoret si një mjet propagandistik për të legjitimuar narrativën se shqiptarët janë të integruar dhe të kënaqur në Serbi – për sa kohë që ata mohojnë Kosovën dhe i binden Beogradit.

Demo Berisha nuk përfaqëson shqiptarët, por një version të të instrumentalizuar për interesa të politikës serbe, sikurse disa tjerë në periudhën e Millosheviqit.

Propozimi i tij si ministër nuk është për të drejtat e njeriut, por për vazhdimin e një politike që do të shuajë zërin e shqiptarëve të vërtetë në Serbi, sikurse përfaqëson edhe një fyerje për të gjitha pakicat tjera në Serbi, që përbëjnë 20 përqind të popullatës së këtij shteti.

Ky propozim është i rrezikshëm sepse legalizon mohimin e identitetit kombëtar të shqiptarëve, dhe institucioni që duhet të mbrojë të drejtat e tyre do të shndërrohet në një parodi të vetvetes.

Prandaj, ky emërim nuk duhet të kalojë pa reagim – as nga shqiptarët e Luginës, as nga institucionet në Prishtinë, as nga Tirana zyrtare dhe as nga faktori ndërkombëtar.

Heshtja ndaj këtij absurdi është bashkëfajësi”, shkruan plot nerv Shaip Kamberi. /tesheshi.com/