Këshilla italiane(ca të çuditshme) për Gjadrin: Kujdes me gratë shqiptare!

Siç raporton Euronews Albania, La Repubblica ka zbuluar se kampi i emigrantëve në Gjadër, pjesë e marrëveshjes mes kryeministrave Edi Rama dhe Giorgia Meloni do të hapet në datën 1 shtator.

Mësohet se 500 karabinierët e parë do të mbërrijnë në vendin tonë pas dy javësh. Stafi që do shërbejë aty, duke përfshirë edhe ata që do punojnë në kuzhinë apo si sanitarë përveç policëve, do ketë edhe rregullore strikte etike, që përmban 14 pika të detajuara.

Një prej këtyre pikave është “të shmangin komplimentet dhe flirtimet me gratë shqiptare” që mund të punojnë aty, por edhe jashtë qendrës.

Kjo pasi siç thuhet, “në Shqipëri, një burrë që sheh gruan e tij duke kompliemtuar apo flituar nga një burrë tjetër, mund të reagojë keq!”.

Por jo vetëm kaq, sepse teksa shqiptarët cilësohen një “popull modest”, “lakuriqësia apo veshja jo e mirë në publik nuk është e mirëseardhur”, shkruan La Repubblica. Pra një kod etike edhe për veshjen, përveç sjelljes morale.

Po ashtu rregullorja përmban edhe mënyrat e sjelljes së personelit italian, duke nisur që nga konsumimi i kafes, i cili duhet të kryhet ulur, e deri te kujdesi me gjuhën, pasi në udhëzim thuhet se thuajse të gjithë shqiptarët e dinë italishten dhe ofendimet mund të shkaktojnë përplasje.

Një nga këshillat përmban dhe faktin se besimi fetar dominant është Islami, por dhe fakti se ekziston një bashkëjetesë mes besimeve.

Po ashtu, theksohet dhe niveli i lartë i sigurisë, sipas këndvështrimit italian.

Rregullorja apo manuali etik për policët italianë:

1-Popullsia shqiptare është shumë mikpritëse, por duhet të merren parasysh disa masa paraprake të dobishme. Shqiptarëve nuk u pëlqen të nënvlerësohen në kuptimin që të mos paraqiten kurrë me një qasje superiore.

2-Ata janë një popull modest, prandaj lakuriqësia apo veshja më pak modeste në publik nuk është e mirëpritur.

3-Shmangni shoqërimin me gratë shqiptare në kontekste të ndryshme dhe në mënyrë të jashtëzakonshme. Është një shoqëri më konservatore, sidomos në veri të vendit. Burri që e sheh gruan e tij duke iu bërë komplimenta nga një burrë tjetër, mund të reagojë keq.

4-Shqipëria është një vend shumë i sigurt, nuk ka mikrokrim (as vjedhje, as grabitje, as ngacmime seksuale). Prandaj shmangni qëndrimet mosbesuese.

5-Në Shqipëri nuk ka fanatizëm fetar. Pavarësisht se është një vend me shumicë muslimane (mbi 50% të popullsisë), ekziston bashkëjetesa paqësore e feve të ndryshme.

6-Kafeja nuk konsumohet në banak, por vetëm ulur: kjo është një traditë absolute që duhet ndjekur.

7-Në restorante, përmbajuni asaj që është përcaktuar në menu: kërkesat për ndryshime në menu nuk janë të mirëseardhura dhe çojnë në gabime dhe keqkuptime.

8-Gatimet shqiptare janë shumë pikante.

9-Kursi i këmbimit është paksa i pafavorshëm në raport me 1 me 100 (1 euro është ekuivalente me afërsisht 100 lekë dhe për këtë arsye nëse paguani në euro humbni afërsisht 0.29 lekë cent, nëse bëni shkëmbimin operacionet kushtojnë shumë më tepër, ashtu si tërheqja dhe transaksionet me kartë krediti, të cilat nuk pranohen kudo).

10-Karburanti (veçanërisht nafta), ka një kosto më të lartë në krahasim me atë në Itali

11-Qendrat tregtare italiane kanë çmime dukshëm më të larta se ato lokale

12-Kini shumë kujdes kur përdorni makina private dhe të kompanisë, për shkak të kushteve të pasigurta të rrugës.

13-Zona e Gjadrit është shumë e infektuar me insekte dhe mushkonja, prandaj rekomandohet sjellja e produkteve repelente (dezinfenktantë).

14-Kushtojini vëmendje mënyrës sesi flisni… pothuajse të gjithë shqiptarët e dinë mirë italishten.