‘Kanë ngritur një sistem vetëm për pasurimin personal’/ Bardhi: Balluku është ‘simbol i korrupsionit’

Drejtuesi politik i PD për Qarkun Fier, Gazmend Bardhi, theksoi se Ministrja e Infrastrukturës Belinda Balluku është ‘simboli i korrupsionit’ në Shqipëri.

Ai tha se Balluku së bashku me kryeministrin Edi Rama e kanë zhytur vendin në krizë pasi sipas tij, ata kanë ngritur një sistem për pasurimin personal.

“Mjaft Korrupsionit! Bashkë me Edi Ramën, Belinda Balluku është kthyer në simbolin e korrupsionit në Shqipëri! Drejtuesja politike e PS për qarkun Fier përfaqëson një sistem të ngritur vetëm për pasurimin personal. Abuzimin me pushtetin e tregon çdo ditë në fushatë përmes arrogancës dhe mentalitetit dhunues të njerëzve në nevojë. Partia Demokratike ka vendosmërinë për ta luftuar korrupsionin, për të mbrojtur qytetarët nga padrejtësitë, për të rritur pagat, pensionet për të shpëtuar vendin nga varfëria, ku e ka zhytur qeveria e Edi Ramës dhe Belinda Ballukut. Koha për të vepruar është tani! Voto nr.1 për të bërë ndryshimin! Shpëto veten dhe Shqipërinë nga korrupsioni!”, shkroi Bardhi në Facebook.