Kampioni i gjashtëfishtë francez i futbollit, Bordeaux, shpall falimentimin
Kampioni i gjashtëfishtë francez i futbollit, Bordeaux, bëri kërkesë për falimentim, konfirmoi klubi, transmeton Anadolu.
“Pas konfirmimit të vendimit të DNCG-së (Drejtoria Kombëtare për Kontrollin e Menaxhimit) për të zbritur FC Girondins de Bordeaux në National 1 (të ligës së tretë), klubi paraqiti falimentimin në Gjykatën Komerciale të Bordos të martën, në mënyrë që të fillojë ristrukturimi i nevojshëm”, tha Bordeaux në një deklaratë.
Bordeaux, i cili për herë të fundit fitoi Ligën 1 franceze në vitin 2009, tha se duhej të hiqnin dorë nga statusi i tyre profesional për të shmangur “sanksionet e rënda shtesë”.
DNCG-ja është mbikëqyrësi financiar i futbollit francez pasi monitoron llogaritë e klubeve profesionale franceze.
“Edhe pse qendra stërvitore do të mbyllet si rezultat, klubi do të vazhdojë të promovojë ekipet e të rinjve”, tha Bordeaux.
Bordeaux ka dështuar të paraqitet në Ligue 1 për disa vite pasi më parë ata ranë në Ligue 2 në vitin 2022.
Në korrik, Fenway Sports Group (FSG), një konglomerat amerikan që zotëron gjigantët e Premierligës angleze Liverpool, u tërhoq nga bisedimet për blerjen e Bordeaux.
Bordeaux, i cili mori statusin profesional në vitin 1937, është një nga klubet ku kanë luajtur shumë yje të famshëm të futbollit si ish-lojtarët francezë Zinedine Zidane, Christophe Dugarry, Bixente Lizarazu dhe Sylvain Wiltord, si dhe ish-sulmuesi portugez Pauleta.
Lojtarët ndërkombëtarë të Francës Aurelien Tchouameni (Real Madrid) dhe Jules Kounde (Barcelona) ishin produktet më të fundit të vlefshme të Bordeaux.
