Inteligjenca turke orkestroi shkëmbim historik të të burgosurve që përfshin 7 vende
Organizata Kombëtare e Inteligjencës e Türkiyes (MIT) udhëhoqi një shkëmbim të suksesshëm të të burgosurve që përfshin shtatë vende, në një nga operacionet më të gjera të shkëmbimit të të burgosurve në vitet e fundit, raporton Anadolu.
Sipas burimeve të sigurisë, gjithsej 26 individë u përfshinë në shkëmbimin e sotëm, të transportuar në kryeqytetin turk Ankara me shtatë avionë, një nga Gjermania, Polonia, Sllovenia, Norvegjia, Rusia dhe dy nga SHBA.
Bjellorusia ishte gjithashtu e përfshirë në shkëmbim.
Dhjetë pengje, duke përfshirë dy fëmijë, u transferuan në Rusi, ndërsa 13 u dërguan në Gjermani dhe tre në SHBA.
Burimet thanë se operacioni, i cili shquhet si shkëmbimi më i gjerë midis SHBA-së, Rusisë dhe Gjermanisë në historinë e fundit, u lehtësua nga MIT, i cili krijoi kanale të rëndësishme dialogu si pjesë e nismës.
MIT mblodhi së bashku përfaqësues nga këto shtatë vende në Ankara në korrik, thanë burimet, duke shtuar se gjatë rrjedhës së këtyre diskutimeve, agjencia luajti një rol qendror duke ndërmjetësuar negociatat që çuan në shkëmbim.
Shkëmbimi historik përfshin figura kyçe
Burimet vunë në dukje se figurat kryesore të shkëmbyera përfshijnë reporterin e Wall Street Journal, Evan Gershkovich, dhe ish-marinsin amerikan Paul Whelan, të cilët mbaheshin në burgjet ruse. Shtetasi gjerman dhe mercenari Rico Krieger, i cili ishte i burgosur në Bjellorusi, ishte gjithashtu pjesë e shkëmbimit, siç ishte edhe figura e opozitës ruse Ilya Yashin dhe oficeri i Shërbimit Federal të Sigurisë Ruse Vadim Krasikov, i cili vuante një dënim në Gjermani.
Sipas burimeve, MIT menaxhoi të gjithë procesin për shkëmbimin, nga negociatat fillestare deri tek shkëmbimi përfundimtar i të burgosurve në Ankara. Agjencia ishte gjithashtu përgjegjëse për masat e sigurisë, planifikimin logjistik dhe koordinimin ndërmjet vendeve të përfshira.
Vetë shkëmbimi u zhvillua nën mbikëqyrjen e rreptë të personelit të MIT, i cili siguroi që secili individ të transferohej në mënyrë të sigurt nga avioni në vende të sigurta.
Pas përfundimit të kontrolleve shëndetësore dhe formaliteteve të tjera të nevojshme, të burgosurit iu dorëzuan përfaqësuesve të kombeve të tyre përkatëse, me fluturimet e tyre të mëvonshme të kthimit gjithashtu të autorizuara nga MIT.
Burimet shtuan se nisma thekson rolin në rritje të Türkiyes si ndërmjetëse në skenën ndërkombëtare nën udhëheqjen e presidentit Recep Tayyip Erdoğan.
Burimet gjithashtu thane se duke përdorur aftësitë e inteligjencës, MIT e ka pozicionuar veten si një lojtar kyç në zgjidhjen e konflikteve ndërkombëtare, duke forcuar më tej statusin e Ankarasë si një kontribues jetik për paqen dhe stabilitetin global.
