Injoranca e papërballueshme e Baton Haxhiut

Baton Haxhiu, një penë ndër të tjera dhe islamofobe, është rikthyer në këtë “gjini” të shëmtuar, të shëmtuar për shumëçka në qasje, ku më e pakta është t’ja fusësh kot e më e shumta të fyesh me lehtësinë e një të ligu e budallai njëherësh një komunitet të tërë.

Në një të fundit shkrim të tillë, Baton Haxhiu që në titull lëshon dorën në tastierë, duke shkruar “hoxhallarë injorantë”, ku më pas, brenda në shkrim, përkundrejt kësaj kurajoje vulgare nuk ka kurajon të thotë se kush na qenkan këta “hoxhallarë injorantë”, pra si e kanë emrin e ku shërbejnë e pse, argumentuar bindshëm, na qenkan të tillë. Por a dini se pse për Baton Haxhiun janë injorantë? Sepse, përkundër ca moderniteteve në ndërtesa në Saudi, ku ai paska qenë për një vizitë atje, në tokën e Islamit, paska hoxhallarë në Kosovë që ligjërojnë për botën tjetër(!). Por pa harxhuar kohë që t’i sqarohet Baton Haxhiut se në doktrinën islame bota tjetër përbënin dhe thelbin kuptimor të kësaj bote, pa u ngatërruar në hotele luksoze nga të cilat ai na qenka mahnitur në Mekë a Riad, lidhje krejt alogjike që ai bën mes tyre, mjaft që bën gafa të rënda si gazetar me shumë ligësi brenda, duke cituar fraza hoxhallarësh tërësisht të sajuara nga fantazia e tij, të cilat nuk ekzistojnë në asnjë lloj ligjërimi islam dhe nuk ka gjasë t’i ketë thënë ndonjë hoxhë, të tilla si: “Gjithçka që është moderne është haram” apo “Jeta e kësaj bote është e pavlerë, shikoni vetëm jetën e përtejme”.

Këto fraza janë kulmi jo i injorancës së hoxhallarëve, pasi nuk ka hoxhë në botë që t’i ketë thënë, t’i thotë, apo që dhe do t’i thotë, por i vetë Batonit, i cili zgjedh të shpërfaqet i tillë që në nisje të shkrimit.

“Kur u nisa, e paragjykova. Nuk e dija që Fairmont Hotel në Mekë ishte kaq madhështor dhe Ritz-Carlton një nga më të mirët në botë”, shkruan ai për Arabinë Saudite, si të ishte viti 1995 e jo 2025. Pra, në një epokë ku botën e ke para hunde me çdo të dhënë, mjaft që të kesh sens pozitiv në informim, ti i qasesh me paragjykim një vendi që ka dhjetra ura lidhëse me vendin tënd, lëndore ose jo lëndore. Arabia Saudite nuk është nga ato vendet ekzotike në qoshet e humbura të globit ku të duhet sforco ta njohësh e ta kuptosh, ngjashëm dhe me Islamin me të cilin identifikohet. Ashtu siç nuk të duhet sforco ta dallosh e kuptosh që Islami nuk ka qenë, nuk është e nuk mund të jetë vetëm saudit, paçka truallit nga ku u kumtua si e vetmja fe e shpallur nga Zoti, jo për arabët por për të gjithë popujt e botës, në çdo kohë. Është një realitet që Batoni e ka gjithashtu para hunde, pa qenë nevoja për udhëtime të gjata me avion për t’i njohur.

Sot, Batoni e ka të ndërtuar përditshmërinë në një realitet ku xhamitë janë përplot me rini dhe jo dosido, si dhe me hoxhallarë e imamë që janë në majat e ndjekjes në rrjetet sociale, krahasimisht jo me ata që këndojnë tallava por me ata kumtojnë, duke kumtuar ide e bindje të bazuara në besim.

Muslimanët sot, në Shqipëri e Kosovë, aksin bazë të jetës së Baton Haxhiut, edhe nëse falen jashtë, siç ai në shkrim e thekson diku si të ishte hata kjo falje jashtë, janë në nivele të atilla që e lënë në bisht formimin kulturor e botëkuptimor të vetë Batonit, nëse vërtet ka diç në këtë formim të tij. Edhe për këtë nuk i duhet shumë sforco; mjaft të interesohet te vetë miku i tij Edi Rama se sa me të tillë ai ka punuar e punon, duke i patur në stafet e tij.

Këshillë miqësore në fund: Baton, ai shkrimi yt i fundit islamofob është një lloj gjinie që ka rënë me kohë nga interesi i publikut. Hahej deri para 20 vitesh por jo sot. Bota ka evoluar, ka evoluar edhe Arabia Saudite, kanë evoluar patjetër edhe muslimanët, por ndryshe nga gjykimi yt i mangët, ndaj evoluo dhe ti! /tesheshi.com/