Bedri Hamza (PDK): 9 shkurti të jetë dita kur fillon një kapitull i ri për Kosovën
Kandidati i PDK-së për kryeministër, Bedri Hamza, ka reaguar pasi presidentja e vendit, Vjosa Osmani, e caktoi 9 shkurtin si datë për mbajtjen e zgjedhjeve parlamentare në vend.
Hamza tha se 9 shkurti do ta përcaktojë drejtimin e ardhshëm të Kosovës, teksa shtoi se beson në kapacitetin e tyre për t’u ngritur mbi çdo pengesë dhe për ta ndërtuar, sipas tij, shtetin modern, të drejtë dhe të barabartë për të gjithë.
“Nominimin për Kryeministër e kam pranuar që të udhëheq me përgjegjësi, transparencë e ndershmëri, duke përfaqësuar interesat tuaja dhe duke i vënë nevojat e qytetarëve në qendër të çdo vendimit tim”.
“Kjo është një rrugë që nuk mund ta përshkoj i vetëm. Prandaj, ju ftoj të gjithëve të bashkoheni me mua për ta ndërtuar një Kosovë më të fortë, më të bashkuar dhe më të drejtë. Së bashku mund të bëjmë ndryshimin që kemi pritur”, shkroi Hamza, transmeton Klankosova.tv.
Tutje, ai tha se është koha për të besuar në të ardhmen dhe për t’u angazhuar që 9 shkurti i vitit 2025 të jetë dita kur fillon një kapitull i ri për Kosovën.
