Gjenden mbetjet e djegura, shënimet e vetëvrasjes dhe lista sekrete e viktimave
Tre furra djegieje, mbetje trupash të djegur, shënime vetëvrasjeje, 400 palë këpucë së bashku me grumbuj veshjesh dhe bizhuterish u gjetën këtë javë në një “kamp shfarosjeje” sekrete të një karteli në Meksikë, raporton The Sun.
Një grup privat vullnetar i quajtur “Guerreros Buscadores” që kërkon njerëz të zhdukur në Jalisco zbuloi një krematorium sekret të improvizuar në fermën Izaguirre në Teuchitlán, e cila është rreth 140 kilometra nga Puerto Vallarta.
Ata filluan kërkimin e tyre pas disa telefonatave anonime që përmendnin rrethana të dyshimta në fermë. Ata u pritën nga një pamje që nuk e prisnin – qindra eshtra të djegura në varre, të rrethuar me gëzhoja plumbash.
Policia beson se ferma ishte një “qendër trajnimi”, e përdorur nga karteli Jalisco Nueva Generación. Në hetim është përfshirë edhe Garda Kombëtare, e cila ka marrë në shqyrtim sendet personale të lëna pas viktimave.
“Ky është një problem shumë serioz, është e pabesueshme që kjo situatë nuk ishte e njohur për autoritetet lokale”, tha Prokurori i Përgjithshëm meksikan, Alejandro Gertz.
400 palë këpucë u gjetën në fermë, që besohet se u përkisnin viktimave që u rrëmbyen dhe u vranë. Ata lanë edhe letra lamtumire për të dashurit e tyre.
“Dashuria ime, nëse një ditë nuk kthehem, kujto sa shumë të dua dhe thuaj: Më ka ikur inati dhe xhelozia”, është një nga letrat e lamtumirës me shkrim dore të zbuluar gjatë hetimeve.
Gjithashtu u gjet një Bibël me fotografitë e tre fëmijëve të fshehur brenda. Hetuesit besojnë se ata i përkisnin prindërve të tyre, kështu që mund të jenë një shenjë shprese dhe përgjigje për familjen e tyre.
Policia tha se gjeti një fletore me pseudonimet e 54 viktimave. Lista ishte grupuar në atë mënyrë që regjistroheshin dhjetë persona njëherësh, por identiteti i viktimave ende nuk është konfirmuar. Jalisco është shteti meksikan me numrin më të madh të personave të zhdukur, gati 15,000, shkruan The Sun. /tesheshi.com/
