Erion Veliaj duket se ka rënë në një dëshpërim të thellë pasi Apeli i GJKKO-së e la përsëri brenda, kur prokurorët Dumani-Dado dërguan në seancë prova dhe fakte të reja dhe e cilësuan si përson të rrezikshëm nëse lirohej pasi përdor pushtetin dhe paratë për të kërcënuar e intimiduar dëshmitarët dhe bashkëpunëtorët për të prishur provat.

Në ato që kanë bërë të ditur gazetarët nga burimet e SPAK Veliaj duket se ka rënduar veten, por edhe vëllain pasi në përgjimet e fundit është kapur duke komunikuar me të dhe duke i lënë porosi të mbante lart sulmin mediatik ndaj prokurorit Dado dhe gjyqtarit Bani, përveç fakteve tjera të rënda të akuzës e cila e akuzon për korrupsion dhe ngritje skemash partrimi parash e fshehje pasurie.

Reagimi i Veliajt pasi mbeti në qeli:

Të dashur miq e dashamirës,

Vendimi i sotëm nuk ishte ai që do të doja, po ishte ai që deshën ata që më janë qepur si të isha armiku më i betuar i këtij vendi.

Do të kisha dashur shumë që ta kisha fituar këtë betejë dhe tani të isha duke përqafuar djalin tim, për të cilin më ka marrë shumë malli!

Por, këta më ngritën edhe një kurth, duke më vënë në përgjim bisedat me gruan e me vëllain nga burgu, dhe shfrimet e mia i kthyen në një dosje të re!

E gjitha është si një ëndërr e keqe, si një film sovjetik, me sigurimsa që i qepen robit deri në poshtërim. Po ja që s’është as ëndërr, as film, po është një ngjarje e jetuar në lëkurën e një familjeje për fustanet imagjinare të gruas dhe dosje të stisura qëllimisht për Kryetarin e Bashkisë së Kryeqytetit.

A ka diku dikush që duhet të dëgjojë e të shohë se çfarë lebetie është e gjithë kjo?! Avokati amerikan, që më siguroi im vëlla, nuk arrinte të kuptonte asgjë, pasi më dëgjonte dhe pyeste: “Dakord, po pse në burg pa gjyq?”. I kam shkruar Inspektorit të Lartë të Drejtësisë, por po më duket sikur kam hedhur në det një letër në shishe, që kushedi se në ç’breg të shkretë ka dalë.

Sidoqoftë, ky nuk është fundi dhe s’ka se si të jetë! Luftën për drejtësi do ta vazhdoj e do ta bëj deri në fund, siç ju’a kam premtuar. Sepse gjatë gjithë jetës sime kam treguar se di të ringrihem. Humbjet na bëjnë më të fortë dhe janë preludi i fitoreve.

Uroj të mos bezdis asnjeri nga ju, sidoqoftë me këtë absurdin që po jetoj unë dhe familja ime. Por, kjo është realisht çnjerëzore.

Faleminderit për çdo mesazh inkurajues e për çdo mbështetje zemre.

Ju përqafoj të gjithëve!